Jizzax politexnika institutida quyosh panellarini ishlab chiqarish loyihasi amalga oshirilmoqda

O‘zbekiston Respublikasi Prezidentining 2023-yil 10-fevral kuni Jizzax viloyatiga tashrifi yakunlari bo‘yicha berilgan 9-sonli topshiriqlar bayonining 70-bandida, Jizzax politexnika instituti olimlari talabalar bilan birgalikda kremniy asosidagi quyosh panellarini ishlab chiqarish loyihasini Jizzax yoshlar texnoparkida amalga oshirish choralarini ko‘rish topshirilgan.

Mazkur topshiriq ijrosini o‘z vaqtida va sifatli ta’minlash maqsadida, Jizzax politexnika instituti va Xitoy Xalq Respublikasining Jiangsu provinsiyasi Usi shahridagi “Wuhan Ooitech Trading Co., Ltd” kompaniyasi bilan umumiy qiymati 348000 dollar bo‘lgan uskunalar yetkazib berish va umumiy qiymati 65000 dollar bo‘lgan xom-ashyolar yetkazib berish bo‘yicha shartnomalar tuzildi.

"Oʻzbekiston ilmiy-sinov va sifat nazorati markazi" davlat muassasasi Jizzax filiali mutaxassislari tomonidan ushbu loyihani ishga tushirish yuzasidan konsultativ va amaliy yordamlar koʻrsatib kelinmoqda.

Hozirgi kunda “Wuhan Ooitech Trading Co., Ltd.”  kompaniyasi tomonidan barcha ishlab chiqarish uskunalari va xom-ashyo mahsulotlari to‘liq tayyorlab berilgan va tayyorlangan yuklar Xitoy Xalq Respublikasidan O‘zbekistonga, Jizzax politexnika institutiga olib kelindi, shartnomaning umumiy qiymati 29000 dollarni tashkil etadi.

Uskunalarni joylashtirish uchun binoning loyihalari tayyorlangan va qurilish ishlari yakuniga yetish arafasida. Ushbu loyihani qisqa muddatlarda ishga tushirish rejalashtirilgan.